मित्रांनो स्वयंपाकघरातून जेवणाच्या ताटात हक्काने कोबी (Cabbage) किंवा फ्लॉवरची भाजी येतेच. आठ-दहा दिवसांतून एकदा तरी प्रत्येक घरात कोबी किंवा फ्लॉवरची भाजी शिजते. भारतामध्ये कोबी बारमाही मिळतो. कोबीचे रोप दीड-दोन फूट वाढते. पानावर पाने चढून त्यातून कोबीचा गड्डा तयार होतो. आरोग्याच्या दृष्टीने अत्यंत फायदेशीर असा हा कोबी ओली व सुकी भाजी, कोशिंबीर, कोबीवडे आदी अनेक माध्यमातून आपल्या जिभेचे चोचले पुरवतो.
कोबी खाण्याचे हे आरोग्यदायी फायदे तुम्हाला माहित आहे का? |Cabbage health benefits in marathi
- कोबी मधुर, पचण्यास जड, दीपक, पाचक, पित्त व कफनाशक, वीर्यवर्धक, तसेच गुणांनी थंड तत्त्वाचा आहे.
- कोबी/फ्लॉवर कफ, पित्त, रक्तविकार, यकृतवृद्धी, पित्तप्रकोप, श्वासविकार, खोकला, प्रमेह, ज्वर, मूत्रकृच्छ, कामोत्तेजक, वातकारक आहेत. कोबीपेक्षा फ्लॉवर अधिक पौष्टिक असतो. मधुमेह्यांनी शिळा कोबी कच्चा चिरून खावा.
- कोबी चिरून वाफवून घ्यावा. त्यात जिरेपूड, बारीक केलेली कोथिंबीर, गाजराचा कीस घालावा. तापामधून उठलेल्या व्यक्तीची पचनशक्ती मंदावलेली असते अशांनी वरील प्रकारे कोबीची कोशिंबीर बनवून खावी.
- तहान लागणे, अतिसाराचा त्रास होणे यावर कोबीचा रस व मध यांचे मिश्रण प्यायल्याने आराम मिळतो.
- काविळ झाल्यास वाफवलेला कोबी खावा.
- मुत्रकृच्छाचा विकार असणाऱ्यांनी कोबीचा रस धनेपूड घालून दिवसातून तीनवेळा घ्यावा.
- आम्लपित्ताचा विकार असणाऱ्यांनी कोबीच्या रसामध्ये गाईचे तूप व साखर घालून रोज सकाळी घ्यावा त्यामुळे मस्तकदाह, उदरदाह, मूत्रमार्गाचा दाह तसेच गुदाशय मार्गाजवळ दाह होणेसुद्धा कमी होते.
हे सुध्दा वाचा:– हरभरे खाण्याचे फायदे तुम्हाला माहित आहे का
- कोबीचा रस चमचाभर मधातून रोज सकाळी घ्यावा. मधुमेह, काविळ हिरड्यांमधून रक्त वाहणे, हृदयाची धडधड, रक्ती मूळव्याध, मूत्रविकार, पोटाचे विकार, त्वचा कोरडी पडणे आदी विकारांवर याचा फायदा होतो.
- हृदयाचा दाह, मस्तकशूळ, उदरदाह यांमध्ये कोबीचा रस साखर घालून घ्यावा, फायदा होतो.
- त्वचा रोग असणाऱ्यांनी (उदाहरणार्थ गाठ येणे, फोड, पुटकुळ्या, मुरुमे येणे) कोबीचे भरीत करून खावे.
- खोकल्याची ढास लागणे, उबळ येणे यांवर पानकोबीचा रस घ्यावा. यासाठी कोबीचा रस काढून तीन तारी साखरेच्या पाकात घालून त्याचे सरबत करून ठेवावे. कफ, खोकल्याचा त्रास होऊ लागल्यास हे सरबत घ्यावे.
- कोबीची भाजी वरचेवर आपल्या आहारात ठेवल्यास पोटात गुबारा धरणे, वरचेवर शौचाला लागणे बंद होते.
- कोबी, फ्लॉवर वातूळ असल्याने गरम मसाला व तेलाची फोडणी देऊन भाजी बनवावी. कोबीच्या अतिरेकी सेवनामुळे काहीजणांना मूत्रावरोधही होतो.
- कच्च्या कोबीची कोशिंबीर बनवून खाल्ल्याने ‘सी’ जीवनसत्त्व प्राप्त होते.
Note – आरोग्यविषयक पोस्टमध्ये दिलेली माहिती प्राथमिक स्वरूपाची आहे. या माहितीचा उपयोग करण्यापूर्वी वैद्यकीय सल्ला नक्की घ्या.
